Setningarhátíð Göngum í skólann

Jóhanna Magnúsdóttir, skólastjóri Lágafellsskóla, hóf setningarhátíðina á því að bjóða nemendur og gesti velkomna. Ólöf Nordal innanríkisráðherra og Haraldur Sverrisson bæjarstjóri fluttu stutt ávörp og hvöttu þau nemendur til þess að ganga, hjóla eða nota annan virkan ferðamáta á leið sinni í skólann.

Þá hvöttu þau enn fremur nemendur til þess að fá foreldra sína til að ganga með sér í skólann og vera almennt dugleg að hreyfa sig. Hildur Karen, frá Grundaskóla á Akranesi, opnaði nýuppfærðan vef Samgöngustofu, www.umferd.is. María Ólafsdóttir, Eurovision-fari, söng nokkur lög og tóku nemendur okkur vel undir með henni. Að því loknu sungu nemendur Lágafellsskóla skólasönginn sinn fyrir gesti ásamt nýju erindi sem tónmenntakennari samdi við lagið „Göngum göngum“ í tilefni dagsins og verkefnisins.

Verkefnið var síðan sett af stað með viðeigandi hætti þegar nemendur, starfsfólk, aðstandendur verkefnisins og aðrir gestir gengu stuttan hring í nágrenninu.

Meginmarkmið Göngum í skólann er að hvetja nemendur og foreldra til að ganga, hjóla eða nota annan virkan ferðamáta til og frá skóla, á sem öruggastan hátt.

Göngum, göngum, göngum út í skóla,

góðri heilsu stuðlum að.

Það má líka hlaupa eða hjóla.

Hreyfum okkur nú af stað.​

Texti:  Helgi R. Einarsson